10 fílar lögðu af stað í leiðangur ... og komu til baka með sólskinsbros á vör

Síðustu viku dvaldi ég að Sólheimum í Grímsnesi ásamt 9 öðrum félögum í Ferðafélaginu Víðsýn. Dvölina höfðum við í stjórninni skipulagt í samstarfi við Óskar í Sólheimum. Okkur var lengi búið að hlakka til ferðarinnar og ýmislegt gekk á við undirbúninginn. En óhætt er að segja að þessir 5 dagar hafa farið fram úr okkar björtustu vonum. Við 10 sem fórum komum öll fílefld til baka og alsæl í sinni.

Samfélagið í Sólheimum er yndislegt í einu orði sagt. Ég gæti alveg hugsað mér að búa þar um tíma. Dásamlegast fannst mér voru morgunstundirnar. Rétt fyrir kl. 9 á hverjum morgni hittast allir í Sólheimum á túni bak við Sesseljuhús og á slaginu 9 haldast allir í hendur og bjóða góðan daginn. Skilaboð af ýmsu tagi eru borin fram og svo sungin morgunsöngur eða bæn. 3 mínútur þar sem allir sameinast í virðingu og fegurð. Dásamlegt.

Við vorum með heilmikla dagskrá tengda heilsu, slökun, hreyfing, menningu og gleði. 5 dekurdagar. við fórum í göngutúra stutta og langa. Ýmiskonar leikfimi, sundleikfimi, jóga og á fyrirlestur um heilsueflingu og annan um Sólheima. Við skruppum í menningarferð í Skálholt, fórum í heilsuböð í Hveragerði á hælinu. Vorum dugleg við að heimsækja kaffihúsið og fórum í listasmiðju þar sem sumir smíðuðu leikföng meðan aðrir fóru í kertagerð. Ég gerði nokkur kerti og hafði mikið yndi af. Sumir fóru í berjamó, það var spilað og spjallað og slakað á.

Við borðuðum í mötuneytinu í hádeginu þar sem við fengum æðislega góðan mat og mikið af grænmeti og hollustu. Annars skiptum við okkur í hópa og sáum um morgunmat og kvöldverð til skiptis. Hafragrautur á morgnana nammi namm. Minn hópur var með mexíkanskt kvöld sem tókst með ágætum. Mannlífið þarna er mjög sérstakt og kraftmikið. Sesselja hefur verið mjög merkileg kona og langt langt á undan sinni samtíð.

Já í einu orði sagt var þessi ferð dásamleg perla í festina sem við í Víðsýn höfum verið að þræða sl. 8 ár formlega en nokkur ár þar áður óformlega. Og alltaf komum við heim sterkari og duglegri til að takast á við það sem framundan er.

Ekki má gleyma heimferðinni sem var óvissuferð. Við fórum og skoðuðum Kerið og Hverasvæðið í Hveragerði með leiðsögumanni, aldrei hafði ég nennt út úr bílnum þar áður. En það er stórmerkilegt svæði og fallegt. Þar suðum við okkur egg í hver :-). Við borðuðum svo á NLFÍ og ég verð nú að segja mér fannst maturinn þann daginn ekki flottur þar eftir að hafa verið í Sólheimum. Við fórum svo í Selvog og heimsóttum Sigurbjörgu í Þorbjarnargerði sem var heilt ævintýri út af fyrir sig. Hún kom svo með okkur í Strandakirkju og sagði okkur sögu staðarins.

Ég vil þakka öllum þeim sem komu að þessarri ferð á einn eða annan hátt fyrir.

Myndirnar millilentu í Kópavogi en koma fljótlega hér inn.

Athugasemdir

[Helga Auðunsdóttir, 21.8.2007 kl. 00:31]

Þetta hefur greinilega verið yndislegt, ég vissi ekki að það væri hægt að vera þarna svona í smá prógrami, enda bý ég of nálægt  til að vita mikið um starfsemina. Skrítið hvað margt fer framhjá okkur sem erum ofnálægt. Hlakka til að sjá myndirnar

[Ása Hildur Guðjónsdóttir, 21.8.2007 kl. 00:32]

Takk Helga þetta var smá tilraunaverkefni sem við skipulögðum saman og eigum örugglega eftir að gera að árlegri ferð.

[Svava frá Strandbergi , 21.8.2007 kl. 00:39]

það verður gaman að sjá myndirnar.

[Laufey Ólafsdóttir, 21.8.2007 kl. 09:28]

Þú ert þvílíkur orkubolti Ása! Ég verð þreytt bara á að lesa það sem þú skrifar hér á þessa síðu og það er ekki af leiðindum ef þú skilur hvað ég á við .

Sesselja var reyndar systir afa míns í föðurætt en ég kynntist henni aldrei. Alveg stórkostlegt starf sem hún vann á þessum tíma þegar þroskaheftir voru kallaðir vangefnir og grænmetisfæði þótti rusl.

Gangi þér vel með hópinn þinn Ása! *smjúts* 

[Ása Hildur Guðjónsdóttir, 21.8.2007 kl. 10:40]

Takk stelpur. Myndirnar koma seinna í dag vonandi. Já það hlaut að vera Laufey enda ert þú líka þvílík dugnaðarkona að ég hef dáðst að þér lengi.

Knús knús